Ч.ЭНХЭЭ: Н.Энхбаяр долдугаар сарын 1-ны асуудлыг хуулийн дагуу шийдэж чадсан

-Та дөрвөн жилийн өмнө Ерөнхийлөгчид нэр дэвшсэн Н.Энхбаярыг дэмжих хөдөлгөөн байгуулсан. Дахин байгуулах болсны шалтгаан юу вэ?
-Намын гишүүн бус хүмүүс сайн дураараа нэгдэж Н.Энхбаярыгулстөрч, туршлагатай удирдагчийнх нь хувьд дэмжиж байлаа. Тухайн үед эл үйл ажиллагаа олон нийтэд нэлээд үнэлэгдсэн юм. Хөдөлгөөний санхүүжилтийн асуудлыг өөрсдийнхөө боломжоор шийдвэрлэнэ. Бусдаас мөнгө төгрөг шаардахгүй. Н.Энхбаярын сонгуульд зориулсан хандив өргөх хүнийг МАХН-ын байр руу явуулна. Хөдөлгөөнд зориулж хандив өргөсөн тохиолдолд сурталчилгаанд зориулах төлөвлөгөөтэй байна. Гэхдээ санхүүгийн асуудлаа өөрсдөө болгоод явна.
-АН Ардчилсан Ерөнхийлөгчтэй болох тухай сурталчилж байна. Таны хувьд ардчилсан ерөнхийлөгч гэж хэн бэ?
-Миний хувьд ардчилсан хүчнүүдийн ардчиллыг хувьчлаад байгаа асуудлыг таашаадаггүй. МАХН хуучин хэвээрээ гэсэн 1990-ээд оны үзэл баримтлал ардчилсан хүчнийхэнд одоо ч байдаг. Би МАХН-ыг шинэчлэгдсэн, ардчилсан үзэл баримтлалтай нам гэж боддог. Н.Энхбаярыг ч ялгаагүй ардчилсан үзэлтэй ардчилсан Ерөнхийлөгч гэж дүгнэдэг, хүлээн зөвшөөрдөг.
-Ерөнхийлөгч Н.Энхбаярын өмнөх тэргүүнүүдээс ялгарах онцлог Таны хувьд юу вэ?
-Улс орон нь ардчилсан Үндсэн хуультай учраас ардчилсан Ерөнхийлөгч байж таарна. Түүнээс биш Үндсэн хуулийг зөрчөөд ардчилсан замаар явах гарц байхгүй. Н.Энхбаяр Ерөнхийлөгч бол хийсэн ажилтай хүн. Анх Мянганы замыг эхлүүлэхэд мянгуужингийн үлгэр гэж дайрч давшилж байсан. Гэвч ажил хэрэг болох нь нүдний өмнө ил боллоо. Дөрвөн жилийн хугацаанд, хийсэн ажлаараа Н.Энхбаяр өмнөх Ерөнхийлөгчдөөс илт ялгарсан. Долдугаар сарын 1-ны асуудлыг хуулийн дагуу шийдэж чадсан. Ц.Элбэгдорж ардчилсан Ерөнхий сайд байж үзсэн. Өөрийнхөө тэргүүлсэн хоёр ч Засгийн газрыг унагаасан шүү дээ. Ц.Элбэгдоржид унагаах зүйл үлдээгүй гэж бодсон гэтэл үлджээ. Тэгээд л Ерөнхийлөгчийн сонгуульд нэр дэвшиж байгаа бололтой.
Ярилцсан Дорж

Б.Баабар: Хаа очиж Энхболд чинь дуугүй байж байгаад шөрмөстэй залуу байна билээ шүү

-Энхбаяр Ерөнхийлөгч сая ээжийгээ эргэнэ гээд Бээжин яваад ирлээ. Олон хүн үүнийг сэжиглэн харах шиг боллоо. Та юу гэж бодож байна?
-Хүний зовлонгоор тоглох гэсэн юм биш шүү. Гэхдээ ийм хувийн чухал ажилтай юм бол Төрийн нарийн бичгийн дарга нар дагуулж явах хэрэггүй л дээ. Монголд байтугай дэлхийд нууц юм байлгах бололцоогүй болж байна шүү.
-Энхбаярыг Ардчилсан намынхан шиг өөрснийхөн нь бас унагах гэж гүйх болов уу? Яагаад гэвэл түүнд дургүйцэх дургүйцэл юу юунаас түрүүн МАХН-д бий гэсэн яриа их байна.
-Тэрийг би яаж мэдэхэв. Сонгуулийн кампанийн дарга нь Баяр, орлогч нь Хүрэлсүх болсон байна билээ. Тэр хоёр л илүү өрөвдөлтэй санагдсан. Шорон гяндангаар айлгаж, нусыг нь хацарт нь нааж амьтан болгочихоод, одоо миний төлөө, намайг сайн хүн гэж магтаад гүй гэхээр хүний эрхэмсэг оршихуйд мөн ч муухай цохилт болно доо. Түрүүн амьтан болсон бол одоо өт хорхой болж дээ. Баярыг ч гэсэн залгамжлагч минь гэж дагуулж баахан сэгсэрч байснаа хамгийн сүүлчийн мөчид Энхболдыг чих зөөлөнтэй, үгээр амьтан гэж гэнэт хулхидан гаргаж ирээ биз дээ. Ерөнхийлөгч, Ерөнхий сайдыг зэрэг хийх гэсэн санаа нь тэр. Хаа очиж Энхболд чинь дуугүй байж байгаад шөрмөстэй залуу байна билээ шүү. Юутай ч нам дотроо Энхбаярын хязгааргүй хаанчлалыг эцэс болгож чадсан.
-Ер нь ажиглаад байхад Ардчилсан намаас нэр дэвшигчийг дэмжинэ гэсэн хандлага давамгайлаад байх шиг...
-Тодорхой нэг жижиг нэгж дээр, суманд ч юм уу хоорондоо ярьж байгаад 100 хувь Элбэгдоржийн төлөө өгөөд үз л дээ. Тэгээд дүн яаж гарахыг хараарай. Аягүй бол 100 хувь нөгөө талд гарна даа. Нээрэн шүү. Ардчилал гэдэг чинь ард түмний хүсэл эрмэлзлээр төрийг бий болгох үйл явц. Гэтэл ингээд хулгайлаад авчихаад байх юм бол үүнийг ардчилал гэж нэрлэх үү, үгүй юү, хэцүү болчихоод байна. Ардчилал манайд хулгайлагдчихаад байна шүү дээ. 2005 оны Ерөнхийлөгчийн сонгуульд Улаанбаатарт хэчнээн тооны санал ямар замаар худалдагдсаныг мэдэх л юм. Хожим үүнийг би батална. Баримтыг нь цуглуулж байгаа. Хэдэн зуу, мянгаар хэмжигдэж байсан гээд бод доо.

Ярилцсан Б.Нандинтүшиг